Keshe Astana qalasynda ornalasqan Qoljazbalar men sırek kitaptar ulttyq ortalyǵynda elimizdiń Mádenıet jáne sport mınıstri Arystanbek Muhamedıuly Japonııanyń elimizdegi Tótenshe jáne ókiletti elshisi Itıro Kavabata myrzaǵa Qazaqstan jerinde erekshe rejımde jazasyn ótegen japondyq áskerı qyzmetkerler týraly arhıv materıaldarynyń elektrondy kóshirmesin tapsyrdy.
Mınıstrdiń aıtýy boıynsha bul shara osydan eki jyl buryn Elbasy Nursultan Nazarbaevtyń Japonııaǵa sapary barysynda elaralyq kelisim negizinde qarastyrylyp, atalmysh mindetti oryndap shyǵý osy vedomstvoǵa tapsyrylǵan eken.
«Osydan 20 jyl buryn Memleket basshysy 31 mamyrdy saıası qýǵyn-súrgin qurbandaryn eske alý kúni dep jarııalap, qazaq jerinde bolǵan saıası qýǵyn-súrgin oqıǵalary qazirgi barsha qazaqstandyqtarǵa ortaq qasiret ekenin aıtqan bolatyn. Osy oraıda, biz aýyr taǵdyr arqalap qazaq jerine kelgen japondyqtar jaıly qujatty óz otandastaryna joldadyq», dedi Arystanbek Muhamedıuly.
О́z kezeginde sóz alǵan Kúnshyǵys eliniń elshisi, qazaq jerinde taǵdyr jazýymen tutqynda bolyp, azap shekken bizdiń baýyrlarymyzdy eske alyp, resmı shara aıasynda kórsetip jatqan qurmetterińiz úshin rahmet, deı otyryp, myna bir derekterdi keltirdi. Keńes dáýirinde jalpy Odaq aýmaǵynda 575 myń japondyq tutqynda bolsa, osylardyń 37-i myńy Qazaqstan jerinde jazasyn ótepti. Bul adamdardyń 1500-ine topyraq osy jerden buıyrǵan eken. Tipti jazasyn ótep bostandyqqa shyqqan soń qazaq topyraǵynda qalyp qoıǵandar da bar.
Osylardyń biri – Qarlagta jazasyn ótegen Ahıko Tesýro. Bul adam týraly eki jyldyń aldynda dramatýrg Mádına Omarova pesa jazyp, ony rejısser Ashat Maemerov sahnalaǵan bolatyn. Nebary 17 jasynda Qarlag tutqyny bolǵan jigit Spassk lagerinde 6 jylyn ótkizip, bosap shyqqan soń ol Qaraǵandynyń Aqtas degen aýylynda turaqtap qalady. Keıin shahtaǵa ornalasady, zaýytta dánekerleýshi bop jumys jasaıdy. Tesýro ýkraın qyzy Elenaǵa úılenip, odan 4 bala súıgen. 1989 jyly tolyq aqtalyp, jarty ǵasyrdan soń týǵan eline baryp, týǵandarymen kórisken. Japonııa úkimeti oǵan páter syılaǵan. Alaıda, onda úsh jyl turǵan soń Ahıko qarııa Qazaqstandaǵy úıine qaıtyp oralǵan.
Shara barysynda elshi myrza Itıro Kavabata bul spektakl 2017 jyldyń aıaǵynda óz eliniń sahnasynda qoıylyp, japondyq kórermen tarapynan joǵary baǵa alǵany jaıly aıtyp ótti.
Beken QAIRATULY,
«Egemen Qazaqstan»